Ang Pagsupak sa Simbahan sa Condom Distribution sa DOH

Pangutana: Nganong supak man ang Simbahan sa condom distribution program sa Department of Health? - KRS

Tubag:

            Tungod sa kalimitado sa espasyo dinhi sa atong Lantawan, maningkamot ko nga matubag ning pangutaha sa minubo apan klaro… Ang nanguna nga rason sa DOH sa ilang pag-apud-apud ug kondom dili isip contraceptive (pagpugong sa pagpanganak) kundili isip prophylactic (pagpugong sa pagtakod sa sakit nga matakod pinaagi sa pakighilawas – sama sa syphilis, gonorrhea, genital herpes, ug labi na gyud sa sakit nga AIDS. Susihon nato unsa man gyud ang sulti sa mga batid mahitungod sa ka-epektibo sa kondom.

            Niadtong Hunyo 12-13, 2000, upat ka ahensya sa gobyerno sa US naghimo ug workshop alang sa pagsuta sa abilidad sa kondom sa pagpugong sa pagkaylap sa AIDS ug ubang sexually transmitted diseases (STD). Ang resulta sa ilang pakisusi giulohan ug: Workshop Summary: Scientific Evidence on Condom Effectiveness for Sexually Transmitted Disease Prevention (mabasa sa internet: hhttp://www.niaid.nih.gov/dmid/stds/condomreport.pdf). Sa pahina 14 sa maong Workshop Summary ginaingon: “Available scientific evidence indicated that the condom reduces the risk of AIDS/HIV by 85%.” Gapasabot kini nga aduna pay nabilin nga 15% nga risgo. Dili tiaw nga porsento labi na kay gahisgot kita ug sakit nga makamatay. Ang 15% nagpasabot nga sa matag 1000 ka AIDS/HIV positive nga kompyansa nga nakighilawas kay nagsalig sa kondom, possible nga makatakod ug laing 150 ka tawo. Ug imbis masumpo ang sakit, modaghan na hinuon ang mabiktima niini.

Unsa may hinungdan niining risgo? Ang unang hinungdan mao nga daghan ang dili kamao mogamit sa kondom. Makompromiso usab ang kaepektibo sa kondom o modako ang mga buho niini kun kini dili maayong pagkatago (pananglitan, gibutang lang sulod sa pitaka) o nainitan samtang gibyahe gikan sa pabrika padulong sa tindahan. Labaw sa tanan, ang hinungdan mao ang kagamay sa AIDS virus. Mas gamay pa siya sa sperm. Ang sperm sa lalaki adunay gigamyon nga 2.5 -3.5 microns, samtang ang virus aduna lamay gigamyon nga 0.15 microns. Niadtong 1998, si C.M. Roland sa Naval Research Laboratory Chemistry Division ug si M.J. Schroeder sa U.S. Naval Academy Department of Chemistry miingon: “The defining feature of viruses is their diminutive size. For example, the AIDS virus is only 0.15 microns, and hepatitis B virus is even smaller. Given the presence in rubber of intrinsic defects two orders of magnitude larger in size, the ability of a condom or surgical glove to prevent transmission of viral particles is problematic.” Gipahibalo ba ang mga tawo niini? Wala gayud! Hinoon, pinaagi sa pagpang-apud-apud sa kondom gitayag kini isip 100% nga proteksyon batok sa sakit nga AIDS. Usa kini ka patootoo! Makasamot kini sa problema sa AIDS! Makadaut kini sa katawhan! Ug ang Simbahan nga adunay dakong pagtagad sa katawhan dili makatugot niini.

Niadtong 1987, ang Thailand adunay 112 ka kaso sa AIDS, samtang ang Pilipinas adunay mas daghan nga 135 ka kaso. Mi-implementar ang gobyerno sa Thailand sa ilang gitawag nga 100% Condom Use Program. Unsay nahitabo? Niadtong 2003, aduna silay 750,000 ka kaso sa AIDS, samtang ang Pilipinas adunay lamay 1,935 ka kaso bisan pa kun mas dako pa ang atong populasyon kay sa ilaha (basaha Telling the Truth: AIDS Rates for Thailand and the Philippines, by Rene Josef Bullecer, M.D.). Kini tungod kay dili kadaghanan ang migamit ug kondom, tungod usab sa pagsupak sa Simbahan, ug pagsupak usab sa mga maayong opisyales sa atong gobyerno nga supak sa condom program ug pagkaylap sa gitawag nato nga promiscuity.